ဒုတိယ ဝန်ကြီး မှ ဒစ်ဂျစ်တယ်နည်းပညာနှင့် ဒေသအကျိုးပြု လက်တွေ့အသုံးချသုတေသနလုပ်ငန်းများ ဖွံ့ဖြိုးတိုးတက်စေရေး ဆောင်ရွက်ရန် ဆွေးနွေးမှာကြား

သိပ္ပံနှင့်နည်းပညာဝန်ကြီးဌာန၊ ဒုတိယဝန်ကြီး ဒေါက်တာနေခြည်လဲ့လဲ့သိန်းသည် ၂၀၂၆ ခုနှစ်၊ မေလ (၁၅) ရက်နေ့မှ (၁၈) ရက်နေ့အထိ  မွန်ပြည်နယ်နှင့် ကရင်ပြည်နယ်အတွင်းရှိ နည်းပညာတက္ကသိုလ်များနှင့် ကွန်ပျူတာတက္ကသိုလ်များ၊ အစိုးရစက်မှုလက်မှုသိပ္ပံများနှင့် အစိုးရ နည်းပညာအထက်တန်းကျောင်းများသို့ သွားရောက်ခဲ့ပြီး သက်ဆိုင်ရာတက္ကသိုလ်နှင့် ကျောင်းများမှ ပါမောက္ခချုပ်များ၊ ဒုတိယပါမောက္ခချုပ်များ၊ စီမံခန့်ခွဲရေးအဖွဲ့ဝင်များ၊ ဌာနမှူးများ၊ ဆရာ၊ ဆရာမများနှင့် တွေ့ဆုံဆွေးနွေးခဲ့ပါသည်။   ထိုသို့ တွေ့ဆုံဆွေးနွေးရာတွင် ဒုတိယဝန်ကြီးက ပညာရေးကဏ္ဍတွင် ရင်းနှီးမြှုပ်နှံခြင်းသည် နိုင်ငံတော်၏ အနာဂတ်ဖွံ့ဖြိုးတိုးတက်ရေး၏ အခြေခံ အုတ်မြစ်ဖြစ်သောကြောင့် တက္ကသိုလ်နှင့် ကျောင်းများ၏ သင်ကြားသင်ယူမှုစနစ်များ စဉ်ဆက်မပြတ် တိုးတက်ကောင်းမွန်စေရေးအတွက် ဒေသတွင်း ပညာရေးစံနှုန်းများနှင့်အညီ အလေးထား ကြိုးပမ်း ဆောင်ရွက်သွားကြရန်၊ ခေတ်မီဆန်းသစ်သည့် ဒစ်ဂျစ်တယ်နှင့် ဉာဏ်ရည်တု (AI) နည်းပညာရပ်များ ဖွံ့ဖြိုးတိုးတက်စေရေးအတွက် နိုင်ငံတကာတက္ကသိုလ်များနှင့် ချိတ်ဆက် ပူးပေါင်း ဆောင်ရွက် သွားရန်နှင့် နိုင်ငံတော်အတွက် လက်တွေ့အကျိုးပြုမည့် နည်းပညာဆိုင်ရာ အသုံးချသုတေသန (Applied Research) လုပ်ငန်းများကိုလည်း မိမိတို့၏ သင်ကြားသင်ယူမှုနှင့် ပေါင်းစပ်လုပ်ဆောင် သွားကြရန် တိုက်တွန်းပြောကြားခဲ့ပါသည်။ 

ဆက်လက်၍ ဒုတိယဝန်ကြီးက ကျောင်းသား၊ ကျောင်းသူများအား ဘာသာရပ်ဆိုင်ရာ ကျွမ်းကျင်မှုများသာမက  ကိုယ်ကျင့်တရား ကောင်းမွန်ခြင်း၊ စည်းကမ်းသေဝပ်ခြင်းအပါအဝင် ဗလငါးတန်နှင့် ပြည့်စုံသော အနာဂတ် ခေါင်းဆောင်ကောင်း လူငယ်များဖြစ်စေရေးအတွက် ဘက်စုံပြုစုပျိုးထောင်ပေးရန်၊ ခေတ်နှင့်အညီ တွေးခေါ်မြော်မြင်နိုင်သည့် ဆန်းသစ်တီထွင်မှု အရည်အသွေးများ ဖွံ့ဖြိုးတိုးတက်လာစေရေး ကိုလည်း အလေးထားဆောင်ရွက်ပေးကြရန်၊ ကျောင်းသူကျောင်းသားများ အလုပ်အကိုင် အခွင့် အလမ်းများရရှိစေရေးအတွက်  ဒေသတွင်းရှိ စက်မှုလက်မှုလုပ်ငန်းများနှင့် ချိတ်ဆက်ဆောင်ရွက် သွားရန် ပြောကြားခဲ့ပါသည်။ ထို့ပြင် ဆရာ၊ ဆရာမများအနေဖြင့် ဘာသာရပ်ဆိုင်ရာ ကျွမ်းကျင်မှု ရှိစေရေးအတွက် အမြဲမပြတ်လေ့လာရန်၊ နိုင်ငံနှင့် ဒေသအကျိုးပြု သုတေသန လုပ်ငန်းများကို ပိုမိုတိုးမြှင့် လုပ်ဆောင်ကြရန်နှင့် မိမိတို့၏ တက္ကသိုလ်များကို နည်းပညာအသုံးပြု Smart University များအဖြစ် ဖော်ဆောင်နိုင်ရေးအတွက် ပူးပေါင်းဆောင်ရွက်ကြရန် တိုက်တွန်းမှာကြား ခဲ့ပြီး ဆရာဆရာမများ၏ တင်ပြချက်များအပေါ် လိုအပ်သည်များကို ပေါင်းစပ်ညှိနှိုင်း ဆောင်ရွက်ပေးခဲ့ပါသည်။ 

ထို့နောက် ဒုတိယဝန်ကြီးသည် စာသင်ခန်းများ၊ လက်တွေ့စမ်းသပ်ခန်း (Lab) များ၊ အလုပ်ရုံများ၊  ကျောင်းသား၊ ကျောင်းသူအိပ်ဆောင်များ၊ ဝန်ထမ်းအိမ်ရာများနှင့် အားကစားကွင်း တည်ဆောက်မည့်မြေနေရာများသို့ လှည့်လည်ကြည့်ရှုခဲ့ပြီး ကျောင်းပတ်ဝန်းကျင် သန့်ရှင်းသာယာ လှပရေးနှင့် ဥပတိရုပ်ကောင်းမွန်စေရေးတို့အတွက် စဉ်ဆက်မပြတ်ဆောင်ရွက်ရန်၊ တည်ဆောက်ရေး လုပ်ငန်းများတွင် သတ်မှတ်စံချိန်စံညွှန်းပြည့်မီစေရေး၊ ဘဏ္ဍာရေးစည်းကမ်းနှင့်အညီ ရန်ပုံငွေများ ကို စနစ်တကျ အကျိုးရှိစွာ သုံးစွဲရေးနှင့် အဆောက်အဉီးများအား ရေရှည်တည်တံ့စေရေး ထိန်းသိမ်းဆောင်ရွက်ရန်တို့ကို ပြောကြားခဲ့ပါသည်။